Ballade vom Matthias Kneißl Songtext

von Zither Manä & HH Babe

1. I bin vo Weikatshof'n, des sog I ungeniert,
Mei Vatta war a Müller, der Pascolini-Wirt,
Mei Muatta war a Zweigal vom Pascolini-Kern,
Sie mog bis heid no imma de junga Bursch'n gern.

2. Bei uns do in da Schachamühl, do is des Leb'n so fein,
Bis schließlich eines Tag's d'Schandarm kehr'n bei uns ein.
Mei Muatta, de habn's eig'sperrt, mia Buama san davo,
An Vattan habn's daschoss'n, den ehrenbraven Mo.

3. Jetz san de Kinda ganz alloa, wia weh duat do da Hunga,
Sie san jetz auf sich selba g'stellt, zum Stehl'n werd'ns dadurch zwunga.
Und wia's d'Schandarm dann hoil'n woill'n, is g'floss'n glei vui Bluat.
Ja san's a fast no Kinda g'wen, aber droffa habn's scho guat.

4. Jetz lest ma's aus da Zeitung raus, d'Schachamühla san vahaft,
Ma hod uns glei recht spöttisch auf Dachau eineg'schafft.
Des Urteil, des hod g'hoaß'n, es war ja gar ned fein,
Hod g'hoaß'n: 6 Jahr Zuchthaus - in's Kloster Kaisersheim.

5. Vom Zuchthaus bin I wieder entlass'n word'n, war wieda a fescha Bua,
I hob bloß wieda arbat'n woill'n, aber d'Leit lass'n mia koa Ruah,
Mei Moasta, der werd zwunga, muaß mia mei Zeignis geb'n.
Jetz muaß I wieda ausse, ins Vagabund'nleb'n.

6. Net weid vo Altomünsta, s'war Nocht und scho stockfinsta,
Mia hockan grod beim Schmauß, do kemma zwoa Schande ins Haus.
Da Fleck'lbauer hetzt und schreit, da Hias legt sein Stutz'n o,
Bis d'Schande ummanandaschaug'n, kracht's und de 2 lieg'n do.

7. Es war am 4. März, in aller Herrgott'sfruah,
Do ging's in Geisenhofen gar sakramentisch zua.
160 Soldat'n san aufmarschiert, 2 Kommisär, ein Arzt.
Do hod se da Kneiß'l Hias'l hinta de Ohr'n a bissal kratzt.

8. Zum Invalid'n hab'ns'n g'schoss'n, des is ja wohlbekannt.
Und daß's an Hias'l g'fanga hab'n, des woaß des ganze Land.
Auf da Bahre hab'ns'n transportiert, a 6 an 8 Schandarm,
Des gibt ja in da Münchna Stodt an fürchterlichen Alarm.

9. Im Februar anno 2, um sieme in da Fruah is's soweit,
Do muaß da Kneiß'l sterb'n, d'Guillotine steht bereit,
Da Fleck'lbaua, der falsche Kerl, macht no G'schäfta mit sein Tod.
Sei Muatta schreit, ihr Mörder, vor'm Grob, in ihra größt'n Not.

10. Ob da Hias in Himme kemma is, des kon g'wiß neamand's sog'n.
Oder ob er gar in da Höll drunt is, des müaßat ma erst dafrog'n.
Ma büaßt, wos ma vabrocha hod, oamoi werd'n ma olle g'richt.
Wenn's g'recht dann geht, san ma olle gleich und Sünda vorm jüngsten Gericht.