Sandino Lyrics

Koot vüür Massaya steht links 'ne Birch römm, 'ne Birch, wie'n Kinder mohle ? steil un spetz, met 'ner Asphaltstrooß, die ahn ihm huhklimmp un 'nem Betonschloß, dat wer dropjesetz. 't heiß Coyotepe, un wenn wer huhjeht, hührte dä Schrei noch, weil dä nie verhallt, dä noch ahnklaach un fleht ? he, wo nur noch Wind weht, durch Kellerflure, dunkel, feucht un kalt. Luhrt durch die Zinne, do litt Monimbo', dös friedlich ungen en der Medaachsonn. Dort jitt et Helde ? tatsächlich Helde. Luhrt se üch ahn, sons weed'er't nie verstonn. Sandino, ich hann ding Ekel jesinn. Sandino, wa's los en dingem Graav? 't weed Zick, dat du als letzter laachs ... dodrinn! Sandino, ey Mann, ihr kritt dat hin! Ich jönn dir, dat du endlich laachs ... laachs un laachs. Conquistadore en Caravelle, un späder dann die Technokrate en Jets, hann immer widder un övverall he üch Marionette op der Thron jesetz. Bloot en Haiti, Verschwundne 'n Chile, Mütter en schwazz en Paraguay, Witwe en Träne, Contra-Hyäne, Rekorderlöse en Panama. Die Ausweiskontroll en Matagalpa: Dä Jung entschuldig sich un jitt mir'n Hand. Säht: "Companero", bet mir'n Z'jarett ahn ? die Bröck wöhr wichtig für't befreite Land, dat Moot zem Dräume trotz all dä Morde hätt, dat leerjeplündert ess noh Gutsherrn-Art. Zweidausend Meile entfernt em Norden, do weeden neue Lüje praatjelaat.