Sunntig-Namitag Songtext

von Tschou Zäme

S isch Sunntignamitag
U d Sunne brönnt mer ufe Chopf
Ha schier e Hitzeschlag
I Schwitze Tropf um Tropf
Rünnt es mr d Backe ab
Brönnt I de Ouge drab
U I frage mi was machi bloss?
Ha schliesslech frei u so
Muess widr bügle in paar Stund
Wett öpis ha dervo
Mit zwöine Ching u Frou u Hund
Nim I dr Chare a d Hand
Und fahre druf über Land
Zu dene Höger wo so grüen si und so gross

Amene Sunntig ufem Land (e-dili-dili-dum-dum)
Amene Waldesrand (es het so vili Brum-Brum)
So zfride früsch u frei
So ganz für üs elei
Es isch e Hit!

D Idee wär schampar guet
U d Chinder fröie sech wie wild,
Hei grad e Würscht ir Gluet
U schiesse es Familiebild
Spiele Versteckis mau,
Das fägt uf jede Fau
Zerscht gits zwe Coupe ire Beiz näb uss
Kenne es Plätzli wo
Mir scho als Ching gäng häre si
Mit üsne Eltere no
Si es paar Jahr jetz scho verbi
Det weti häregah
Dassi ne zeige cha
Ou I der Freizit isch der Papi Boss

Amene Sunntig ufem Land (e-dili-dili-dum-dum)
Amene Waldesrand (es het so vili Brum-Brum)
Si zfride früsch u frei
So ganz für üs elei
Es isch e Hit!

Aber ojemine
Das Örtli kenne schinbar vil
Cha scho vo witem gseh
S isch nüme ganz sones Idyll
Es füehrt e Strass derzue
Und Parkplätz het es gnue
S längt fürne Schützepanzerkompanie.
Dert stöh si ahadarah,
Si heisse Honda Yamaha-ha-ha-ha-Harley
Und hei alli Läderhose a
Si trinke Coci light
U lose Disco Night
Und mache Motopowerlight-Philosophie-ie-ie

Amene Sunntig ufem Land (e-dili-dili-dum-dum)
Amene Waldesrand (es het so vili Brum-Brum)
Füehle sech schampar frei
Si nid so gärn elei
Findes e Hit!

D Frou luegt mi fragend a
Aber I blibe in der Stund
Der Simi seit "Papa
Dörf dörf brum-brum"
Het schinbar Fröid da dra
I cha das nid verstah
U fahre retour I die lääri Stadt.

Amene Sunntig ufem Land (e-dili-dili-dum-dum)
Amene Waldesrand (es het so vili Brum-Brum)
Füehle mi nüm so frei
Wär lieber eis elei
Findes e Shit!

Oooh amene Sunntig ufem Land (e-dili-dili-dum-dum)
Amene Waldesrand (es het so vili Brum-Brum)
So zfride, früsch u frei
So ganz für üs elei
Das wär e Hit!