Bärnhard Matter (1821-54) Songtext

von Mani Matter

Für mi sälber mir z'erkläre,
Bin i mal mym Stammboum na
Ha vo undre Zweige här e
Chly die Nuss probiert z'verstah.
Wär da alles mir verwandt isch,
Han i gluegt, us Quelle gschöpft.
Numen eine wo bekannt isch
Worde git's: Dä hei si gchöpft.

S'isch dr Gouner Bärnhard Matter.
Us em Aargou, win ig o.
Wenn o nid my Urgrossvatter,
Urgrossungglen allwäg scho.
Dä het da, vor hundert Jahre,
üsem Gschlächt e Wäg bestimmt,
Win i jitz ersch ha erfahre,
Dass eim nüt meh wundernimmt.

Är het i sym Läbe gstole,
Was im isch id Finger cho.
Und was nid isch cho ga z'hole,
Het är gärn d'Müe uf sech gno.
Isch gar mängisch z'nacht ydrunge,
Dür ne Hüenerstall i ds Hus -
Und isch mit zwo gröikte Zungen
Und zäh Gulddukate drus.

Drü- viermal het me ne gfange,
Het ne ds Gricht i ds Gfängnis gsteckt.
Aber är, s'isch nid lang gange,
Het e Fluchtwäg gäng usgheckt.
Die Diät vo Brot und Wasser,
Het er ungärn zue sech gno
Und het alls dra gsetzt, für dass er
In e Bessri Peiz isch cho.

Das het müesse ds Gricht verdriesse,
Es het zletscht Befähl erla -
Nid die Gfängnis besser z'bschliesse,
Nei däm Schelm dr Chopf abzschla.
Ds halben Aargou isch cho gschoue,
Win es Schwärt dr oberscht Bitz
Vo mym Vorfahr het abghoue,
Wi vom weichen Ei dr Spitz.

Drumm chan i nüt garantiere,
Was's us mir no alles git.
S'cha no mängs mit mir passiere,
Denn da spilt d'Vererbig mit.
Und we dir ds Gfüel heit, dertdüre
Chönn nech sicher nüt ebcho.
S'chunnt uf ds mal en Unggle füre,
Wo dir nüt heit gwüsst dervo.
S'chunnt uf ds mal en Unggle füre,
Wo dir nüt heit gwüsst dervo.