Bummler uf Rüti Songtext

von Stahlberger

I fahr mitem Bummler uf Rüti
Und es stiged immer meh lüt ih
Und eine seit isch do frei vis-a-vis
Und i seg nöd nei und er sitzt hi

Er sitzt mit grade bei
Und mitme grade rugge
Er het öppis im muul
Ez tueters abeschlugge
Es isch en biss rohe fenchel
Denn nimmter en neue
Es knackt im muul
Und wird dumpfer bim choie
Und wenns verklunge isch
Bisster wider mit dem luute grüsch fum fenchel ab
Und choit öppe zwo minute pro biss
So vill geduld hetti nie wie de mah
Und rohe fenchel esse hani ned mol gwüsst das mer da cha
Aso es goht so fini schibli im salot da isch eis
Aber gad so wienen öpfel
Isch no krass und i weiss
I mösst au meh is reformhus
Und sicher meh sport
Und nüme fernsehluege
Sondern mi de schönheit fu de wort higeh
Büecher lese
Mi interessiere für kunst
Und au fu harfemusig hani überhaupt kein dunst

I fahr mitem Bummler uf Rüti
Und es stiged immer meh lüt ih
Und vis-vis sitzt en mah
Er choit und luegt mi ah

Jo da chunnt jez no dezue
Sit em ne wiili
Luegt er mir di ganz zit id auge
Wie bi dem spiili wos drum goht wer länger nöd mues lache
Aber mit fremde im zug chasch da doch nöd mache
Oder hets öppis komisches a mir
Wo ih nöd check
Er luegt und wenn ih lueg luegter immerno nöd weg
I versuech mi abzlenke
Irgend en trick
I lueg veruse
Aber i gspür di ganz zit sin blick
I zell d chemi fu de hüser
4 5 6 7
Und denn merki er spieglet sich jo i de schibe
Jez traiter de chopf
Und fangt sich ah [?]
Vilich luegter au id schibe
Drum luegi an bode
Aber er bückt sich
Aso luegi wider veruse
Und es schmeckt so süässlich noch fenchel
Und fangt mi langsam ah gruuse

Aso wie gsait er bückt sich
Zum öppis us de mappe useneh
Es isch en thermoschrueg
Wohrschindlich fencheltee
Aber egal de chrueg isch leer
Da gschehtem recht
Er schüttleten
Als öb da öppis brächt
Notürlich nöd
Er versorgten wider i de mappe
Luegt gradus und biist wider fum fenchel ab

I fahr mitem Bummler uf Rüti
Und es stiged immer no lüt ih

Und i frög mi wa mached denn die alli do usse
Und mengi fahred denn sogar no witer mitem bus