Napocalisse Lyrics

Nera comme ‘na maschera ca ‘un porta cchiù nisciuno,
Nera comme sta terra, terra d"o zi Nisciuno,
Nera comme ‘a canzona nata ‘o 43:
Chillo ‘o fatto è niro niro, niro niro comm'a cche!
Nera comme na gatta ca ce scippa ‘a furtuna,
Niro comme ‘o rraù ‘ncopp'a sti maccarune,
Nero filosofia ca recita accussì:
Cchiù nera d"a mezanotte nun pò vvenì!
Niro comm'a nu carro c"o tiro a otto cavalle,
Pe quante songo ‘e Rre ch'ammo purtato ‘ncuollo,

Ma assaje cchiù nera è ‘a mmiria ca vott"o nniro ‘e seccia
Si guerre e terremote c'hanno spezzato ‘e bbraccia!
Nera comme fuje nera ‘a peste d"o Seiciento,
Nire comme so' nnire ‘e piere d"e fujente,
Nera comme na còzzeca ca ce purtaje ‘o culera,
Chi sa chi nce l'ha fatta chesta fattura nera!
Nere comm"e bbandane ‘e turche e ssarracine
E Nàpule ogni ghjuorno se veste ‘a marrucchina.
Nera comme ‘a taràntola ca ce pugnette ‘a pella
E ppe caccia ‘o vveleno nascette ‘a tarantella!
Nere comme so' ‘e nnicchie ‘e tutt"e ccatacombe
Ch'hanno annascuso ‘e martire e hanno scanzato ‘e bbombe.
Nere comm"e ffelinie sott'a nu scantinato
Addò stanno ‘nzerrate ‘e ‘mbroglie d"o ppassato:
‘a crumatina nera scurdata ‘a nu sciuscià
Ch'ha pulezzato ‘e scarpe cchiù nere ‘e sta città,
‘a cascettella nera pe ll'aneme d"e muorte
Ca quanno erano vive nun se ne songo accorte!
Na cartolina ‘e Napule ancora bianca e nera,
‘a tuta ‘e n'operaio quanno na cemmenera
Facette ‘o cielo niro, cchiù niro ‘e nu cummuoglio,
Pe cummiglià Bagnoli e avvelenà Coròglio!
Nere comm"e nnuttate schiarate senza stelle,
Nere comme so' ‘e llacrcme ‘e tutt"e femmenielle,
Nere comm"e ffurmiche aret"o scarrafone
Si ‘a ciorta nera ‘e Napule è cchesta prucessione:
1000 speranze ‘o juorno aret'a n'estrazione.
80 mila aneme aret'a nu pallone,
100 mila cantante aret'a n'illusione,
Troppi Nennille ancora aret'a nu zuppone!
Nera comme ‘a pistola ‘e ogni cammurrista
E Nera pure ‘a cronaca ca scrive ‘o giurnalista.
Niro comme ‘o ‘nteresse ‘e chi senza serenghe
S'accatta ‘a famma ‘e ll'ate e ppo' lle tira ‘o sanghe!
Nere comme so' ‘e ttonache d"e prièvete ‘e mestiere
Ca sanno ‘mbruglià ‘o prossimo cu ll'arma d"e ppreghiere.
Nera comme ‘a divisa ‘e ogni carabiniere,
Nera comm'a na Vespa ca fuje ‘ncopp"e Quartiere.
Nere comme so' ‘e mmane ca pàreno pulite
Pecchè a ccuntà ‘e denare nun se so' maje spurcate.
Nere comme so' ‘e ttoghe ‘e giudice e avvocate,
Nere comm"e ccuscienze ‘e cierti magistrate.
Nere comme so' ‘e ppenne ‘e tutt"e prufessure,
‘e Porsche d"e primarie, ‘e bborze d"e dutture,
L'unica cosa VERDE è ‘o ffele d"e malate
Ch'hanna passà pe forza p"e ccliniche private!
Niro comm'è ‘o vestito d"a Maronna Addulurata,
Nere comm"e ddenocchie ‘e na mamma addenucchiata:
Una ca chiagne ‘o figlio cu ‘e chiuove dint"e mmane
E n'ata chiagne ‘o figlio cu ‘e bbuche dint"e vvene!
Nire comm"e capille tignute ‘e na puttana,
Nera comme ‘a jastemma, ‘a cchiù napulitana:
Puozze passà nu guajo, e nniro ll'ià passà!
Cchiù nniro d"o ccafè ca sti vvocche fa' accuncià.
Nere comme so' ‘e llente d"o popolo cecato,
Ca nun vere né primma, né doppo ch'ha vutato
Tutt"e pulicenielle cu ‘e mmachine blindate
Ca passano currenno ‘mmiez"e disoccupate.
Nera comme sta razza ‘e carnagione scura
Chi sa si è stato ‘o sole o è nera p"a paura?
Niro comm'a nu fummo ca da cient'anne a ajere
Ce vènnono ogni ghjuorno ministre e ministere.
Niro comme ‘o curaggio ‘e chi nun è partuto,
‘e chi è rimasto a Nàpule e nun se n'è ffujuto.
Nera comme fuje nera ‘a fessa d"a Sirena
Ca ce futtette ‘o core e ancora ce ‘ncatena!