Fenesta ca luciva Songtext

von Claudio Villa

Fenesta ca lucive e mo nun luce...
Sign'è ca nénna mia stace malata...
S'affaccia la surella e che me dice?
Nennélla toja è morta e s'è atterrata... Chiagneva sempe ca durmeva sola,
Mo dorme co' li muorte accompagnata...

"Cara sorella mia, che me dicite?
Cara sorella mia che me contate?"
"Guarde 'ncielo si nun me credite.
Purzi' li stelle stanno appassiunate.
E' morta nenna vosta, ah, si chiagnite,
Ca quanto v'aggio ditto è beritate!"

"Jate a la Chiesia e la vedite pure,
Aprite lo tavuto e che trovate?
Da chella vocca ca n'ascéano sciure,
Mo n'esceno li vierme... Oh! che piatate!
Zi' parrocchiano mio, ábbece cura:
Na lampa sempe tienece allummata..."

Ah! nenna mia, si' morta, puvurella!
Chill'uocchie chiuse nun l'arape maje!
Ma ancora all'uocchie mieje tu para bella
Ca sempe t'aggio amata e mmo cchiu' assaje
Potesse a lo mmacaro mori' priesto
E m'atterrasse a lato a tte, nennella!

Addio fenesta, rèstate 'nzerrata
Ca nénna mia mo nun se po' affacciare...
Io cchiù nun passarraggio pe' 'sta strata:
Vaco a lo camposanto a passíare!
'Nzino a lo juorno ca la morte 'ngrata,
Mme face nénna mia ire a trovare!...