E susi pasturi Lyrics

Vuotu l'uocci a la marina,
Viru veniri a du' pasturi:
"Pastureddi unni jiti?"
"Jemu a vidiri a lu Signuri".

"Ppi manciari chi cci purtati?"
"'N acidduzzu 'nta 'n panaru,
Racinedda 'nta 'n cufinu,
Ppi manciari Gesù Bamminu".

E susi pasturi nun dormiri cchiù
Lu viri ch'è natu 'u Bamminu Gesù.

Sta calannu 'na Susanedda,
Sta calannu di li muntagni;
Cu 'na cannistredda 'n testa,
China 'i mennuli e castagni.

E lu poviru picuraru,
Nenti avia chi cci purtari;
Cci purtau 'n agnidduzzu,
P'arricriarisi Gesuzzu.

E susi pasturi...

E la notti di Natali,
Tuttu zuccuru e tuttu meli.
Ca nasciu 'mmenzu l'animali
Lu rignanti di li genti.

E la notti di Natali,
Fanu festa li parrini;
Nun aviennu chi manciari,
Manciunu cricchi di jaddini.

E susi pasturi...

Sutta 'n peri di nucidda,
C'è 'na naca picciridda;
Si ci annaca lu Bamminu,
San Giuseppi e San Jachinu.

San Jachinu ccianau 'n cielu,
Ppi sunari tri campani;
Tri campani su' sunati,
Viva viva la Trinitati.

E susi pasturi...